ABŞ-ın dövlət katibi Hillari Klintonun Serj Sarkisyana zəng edərək onu Barak Obamanın adından "Beynəlxalq nüvə təhlükəsizliyi” sammitinə dəvət etməsi İrəvanda ciddi müzakirələrə səbəb olub.Ermənistan mətbuatı "Daşnaksütyun” partiyasının bununla bağlı bəyanatını yayıb. Daşnak partiyası Serj Sarkisyanın ABŞ-a dəvət olunmasını 24 aprel qondarma erməni soyqırımının qeyd olunması ərəfəsində Ermənistan üçün qurulan tələ kimi qiymətləndirib. Bu ərəfədə məlum olub ki, Ermənistan prezidenti Serj Sarkisyan ABŞ dövlət başçısı Barak Obamanın Vaşinqtona dəvətini qəbul edib. Bu barədə Ermənistan prezidentinin mətbuat xidməti xəbər yayıb. Qeyd edək ki, Türkiyənin baş naziri Rəcəb Tayyib Ərdoğanın da sammitə qatılacağı gözlənilirdi. Lakin qondarma erməni soyqırımı qətnaməsinin Konqresin Xarici Əlaqələr Komitəsində qəbulundan sonra baş nazirin ABŞ-a səfəri qeyri-müəyyən olaraq qalır.